لو تدري البعد شيسوي وسط الروح
لو تدري الفراگ بحالتي شسوه

مثل طفله يتيمه ومن اجاهه العيد
ظلت عينهه على الباب تتلوه

جروح البيهه زادت شگگت بالثوب
بس الله اليداوي واهل المروه

لو تدري البعد خلف جروح ازغار
كبرن بالبعد واتزوجن قسوه

حفل بعدك ضخم وتوزعن دعوات
عازم شكو شامت..يسوى ما يسوى!!

امنتك عليه وخنت ودي شبيك؟؟
صافن بس عليك وماي من جوه

انطيتك عمر بهمومه والافراح
والاشعار كلهه ترخصت..فدوه

ياتربة غدر ودموع عيني الماي
تشربهم بساع وابد ما تروه

لو ندري العشگ يلعب لعب بالروح
ما حبينه شخصك لا ولا نهوى

من يا صخر گلبك انته اي مخلوق؟؟
وبداخلك گلي شيضم وشيحوى؟؟

ما اگلك اناني لا ولاغدار
اگلك انته انته وقدر شتسوه

ما اخاطب ضميرك ادري بيه مدفون
واليخاطب الميت ينتظر صحوه؟؟!

ما ابچي على حالي اني ابچي عليك
اخاف عليك منك لاحتك عدوى

حبيتك نعم اعترف اني ابهاي
مااگدر اكرهك هيه مو گوه

بس حبيت اسلم واسال على الحال
عساك بخير وتنال الذي تهوى ...