الى كل شخص يمر عليه العيد بدون ام



يمه البيت عگبچ يبچي عالبيت

وسود وداعتـــــچ شفـت الحياطين
وعتبة بيتنه زعلت على الباب
وعلينه أتسودنت ما ترضى ترحين
وشفت دمع البلابل والعصافير
طاح إعله المكان البــــي تگعــدين
وشفت لطخت حزن بخدود الورود
وصبح بستانه يبچي البـــــــساتين
فراگچ موسهل يذبحني كل يوم
كل يوم بسـنه لا والله عشـــــــرين
ييمه بفرگتچ نص عمري ماخوذ
ولا چن فرگتـــــج يايمه يـــــومين
ما أدري شيضل لو طال الفــــــراگ
على هذا الوضــــع ينراد عمــــرين
شكض من الدمع ودموعي شلال
وعليچ اتسودنت ماتسكت العــين
چلمة يمــــه منــــچ بلسم جــروح
وچلمة بعد بيتي أتداوي جرحـــين
أذا موجوده يمه نصير عـــــــقال
ونصـــير بغيبتـــچ مثل المجانـين
على وجهچ لگينه الحزن مـرسوم
وگبـــاله الفرح ذابحـــــته السـنين
تروح بروحتچ ماتبـــقى ارواح
جسد واگف چــذب بس احنه ميتين
يااجمل وحن مخلوق بالكــــون
مثلچ ما كو مثلـــــچ أقسم اثنــين
تحت جدمچ جنان وتجري انهار
وبعـــد فوگ الجـدم اشكال تلــگـين
يا ام الوفه ماشــــوف أوفيـــــــچ
لو گد نــوح عمري ايصــير مرتين
اغفه بحضن صبرچ وانه شبــعان
واحس جوعانه كلـــش من تنـــامين
امي الجــــنه انتـــــي منزله بيت
وتنام بظـــلچ ابيــوت الجــــــوارين
سكوتچ ادري يمه يحير الليل
مثل صفنة بـــحر لمـــن تصفنيـن
واذا تحچين بلبل يعـــــزف الحان
ومن حلكچ يظل يتطـــافر الــتــــيـن
خيط السبحه انتي اخذينه ويـــــــاچ
نتطشر خـــــرز لمــــــن تروحــــين