دخيل الله اشبعد؟ خلّصن سبع سنين
تاريخ النفاذ لغيبتك قد تم
سنابل يابسات وخلصن الحبّات
ومخازن جفن عيني فرغت امن الدم
نسيت اسمك والک لو ادري ما حلمان
تعال امطر ..بعد والكعبة ما أحلم
لو ادري الحلم تفسيره راح اتغيب
چا ما نمت ساعة ولا جفن سلهم
ولك صبري انصلب وابراسة ياكل طير
وعصرة خمر روحي انعصرت امن الهم
وگحط طگهن جروحي ابعرض گحط النيل
بحبال ومرادي اخياط ماتلتم
وشيلمهن افراحي المثل صفط اوراق؟
وعواصف حزن جتهن شايلات اخيم
سمان احلامي چانت سارحة ابطرواك
وعجاف اسنين هجرك بالسمن تلهم
تل هم صار خدي وگعدن الحسبات
عالتل بنتظارك شيبهن خضرم
تعال امسح جمر بعيون مبيضّات
لدّور دمع ماضل دمع يفهم
واصفن عالدرب كل صفنة عمر آمون
وصفنة اتگل لختهة البينا ياهي اقدم؟!
ودزلك نسر گلبي وبلكي يلچح غيم
يتعدة الشمس وايعود لي امفحم
واحط حفنة اشواگي ابحلگ رحّى اتدور
يصهرنها صهر واحجار تتهشم
مگص هجران شخصك وآنا گلبي قماش
وچف جاهل زماني ابگلبي يتعلم
نخلة امن العطش يبّست صارسنين
واتحلّم يجي ويهزني چف مريم
وافز امن الحلم والگاها طبرة فاس!
اذا متعود هسة المغرب اتچيّم
صورة ارسمت روحي ابمملكة احزان
ما اشرح واعيد الصورة تتكلم