طيح دمع هجرك كحله الباب

وشلع ضحكاتها من گاع السنون

نحب غيرك نوينه ونرجع انگول

بيا ماي ايتبدل ماي العيون

نحب جرف النهر جي بي طبع بيك

حصره اضل اله بگلب اليغركون

وينك ما بقن بلساني چلمات

ورد بيهه عن العنك ينشدون

وينك مو ذبل بچفوف الايام

عمري وهملته اچفوف اليحصدون

اشكثر مرو شفتهم ما يشبهوك

وحتى الماشفتهم ما يشبهون

ششكيلك علي ما دمعت عين

وانه امعلم اليتامه اشلون يبچون

سفينه وما نصح وياي الشراع

وجليله مستحه اچفوف اليجدفون

اقنعمن يعوفك خاطر انساك

عيني اشلون تغفه ابيت مسكون

تشگگ ثوب اصبعي ابعظ السنون

وثكل حيل الندم واحتاجله امتون

طبع بيها الذيابه اتهاب الجروح

تلوم الما تطيب اجروحه اشلون

اشوف ونبت عودي بگاع عميان

صبح ينداس طرفي وانه ممنون

صرت مثل التعنه بجدمه للنار

حل ما ينچوي الوادم يصيحون

الزرعو ما لگوني ابين الوجوه

ولا منجل طلعلي وي اليحصدون

وانه اليم الشمس ما غمضت يوم

رغم من ثلج عيني امفتحه الجفون

على اعيون الصبح كحله اني ما صير

دمع وخربت شغل اليكحلون